Mediteer uit die Woord

Is die lewende Woord van God vir jou werklik lewend of is dit maar net nog ‘n boek wat stof opgaar? Vir my raak die Woord slegs lewendig as jy dit deel van jouself maak. Hoekom wil jy dit deel van jouself maak? Die “Woord” self, gee vir jou die antwoorde.

“In die begin was die Woord, en die Woord was by God, en die Woord was God” (Joh. 1:1). God is in jou, God is Liefde en God is die Woord self. God verlang daarna dat jy Sy Woord in jou hart sal skrywe.

God inspireer jou verder met: “Maar Jesus antwoord en sê vir hom: Daar is geskrywe: Die mens sal nie van brood alleen lewe nie, maar van elke woord van God” (Luk. 4:4). Hoe lewe ʼn mens van elke woord van God? Hoe maak jy dit deel van jouself?

Dan die kersie op die koek: “Maar elkeen wat sy woord bewaar, in hom het die liefde van God waarlik volmaak geword. Hieraan weet ons dat ons in Hom is” (1 Joh. 2:5). Hierdie versie maak ʼn mens sommer opgewonde en honger vir die Woord van God. Hoe dan anders, dit is mos die Ware Liefde waarna ons smag! En dit is mos die sleutel tot selfliefde en liefde vir ander! Boonop, voorsien God self, deur die versie, vir ons die inspirasie om in Sy Woord in te duik!

Dit bring my terug by die vraag: Hoe maak ek die Woord deel van myself? Die bestudering van die Bybel om God te leer ken, is beslis ʼn goeie begin, maar meditasie neem dit net ʼn stappie verder. Dit is ‘n wonderlike manier om die Woord van God in jou hart te skryf en weliswaar, ware liefde binne jou te kweek.

In die verlede het ek meditasie vereenselwig met mense wat met gekruisde bene sit en dieselfde woorde oor en oor neurie. Dit is egter glad nie dieselfde as Bybelse meditasie nie. Volgens die woordeboek is die woord mediteer, sinoniem met die woorde peins en oordink. Jy kan dit sien in onder meer Ps. 143:5 “ek peins oor al u dade” en Ps. 119:148 “om u woord te oordink”. In die meeste Engelse vertalings, soos onder andere die “King James” en “American Standard”, word dit as “meditate” vertaal. Meditasie kom dus daarop neer dat jy diep wil nadink oor skrifgedeeltes, sodat jy dit deel van jou lewe kan maak.

God het ons elkeen uniek gemaak en daarom wil ek nie voorskriftelik wees oor hoe jy moet mediteer nie. Laat die Heilige Gees jou lei daarmee. Ek wil net graag met jou deel oor hoe ek mediteer. Persoonlik mediteer ek net as ek werklik alleen is en daar niks is wat my aandag kan aftrek nie. Dit is vir my baie lekker om in die natuur te mediteer, maar as dit nie moontlik is nie, dan sommer in enige vertrek waar ek alleen kan wees. Wanneer ek alleen met God is, raak meditasie vir my ʼn sielsveranderende ervaring.

Een van die skrifgedeeltes waaroor ek die graagste mediteer is Psalm 23. In die Psalm vertel Dawid wat sy liefdevolle Vader vir hom beteken. Ek en jy is ook kinders van dieselfde liefdevolle Vader. Dit wat Hy vir Dawid gedoen het, doen Hy ook vir my en jou. Ons besef dit net nie altyd nie. Ons sal die realiteit van die gedeelte al hoe meer besef as ons dit deur middel van meditasie in ons harte skryf.

Wanneer ek oor Psalm 23 mediteer, sien ek myself in die skoene van Dawid. Ek self praat met God en oordink alles wat ek sê. Op so ʼn manier skryf ek die gedeelte in my hart en maak ek dit deel van myself. Natuurlik kan dit nie anders as om my verhouding met God, te verbeter nie!

Om die Psalm my eie gesprek met God te maak, verander ek die “Hy” na “U” en die “die” na “U”.
Die kern van die Psalm word glad nie verander nie. Hieronder staan die oorspronklike Psalm 23, gevolg deur die aangepaste Psalm 23.

Psalm 23 (1953 – vertaling)
1. “ʼn Psalm van Dawid. Die HERE is my herder; niks sal my ontbreek nie”.
2. “Hy laat my neerlê in groen weivelde; na waters waar rus is, lei Hy my heen”.
3. “Hy verkwik my siel; Hy lei my in die spore van geregtigheid, om sy Naam ontwil”.
4. “Al gaan ek ook in ʼn dal van doodskaduwee, ek sal geen onheil vrees nie; want U is met my: u stok en u staf dié vertroos my”.
5. “U berei die tafel voor my aangesig teenoor my teëstanders; U maak my hoof vet met olie; my beker loop oor”.
6. “Net goedheid en guns sal my volg al die dae van my lewe; en ek sal in die huis van die HERE bly in lengte van dae.”

Psalm 23 (aangepas)

1. “ʼn Psalm van Dawid. Here, U is my herder; niks sal my ontbreek nie”.
2. “U laat my neerlê in groen weivelde; na waters waar rus is, lei U my heen”.
3. “U verkwik my siel; U lei my in die spore van geregtigheid, om U Naam ontwil”.
4. “Al gaan ek ook in ʼn dal van doodskaduwee, ek sal geen onheil vrees nie; want U is met my: u stok en u staf dié vertroos my”.
5. “U berei die tafel voor my aangesig teenoor my teëstanders; U maak my hoof vet met olie; my beker loop oor”.
6. “Net goedheid en guns sal my volg al die dae van my lewe; en ek sal in U huis bly HERE in lengte van dae.”

Ek wil graag deur elke versie van die aangepaste Psalm 23 werk om ʼn aanduiding te gee van hoe ek dit oordink.

Ps. 23:1 “ʼn Psalm van Dawid. HERE, U is my herder; niks sal my ontbreek nie”.
Ek dink nie in hierdie versie daaraan as net “ʼn Psalm van Dawid” nie, maar ook as “ʼn Psalm van myself”. Psalm 23 word daardeur vir my ʼn persoonlike gesprek met God. “U is my Herder” laat my dink aan die kwaliteite van ʼn herder; Sy voorsiening, Sy beskerming, Sy oneindige liefde. Dit laat my ook daaraan dink dat God my so lief het, dat Hy binne my is en ek in Hom. Dat Hy wie Liefde self is, binne my heers. Dat ek nooit sal ontbreek aan die liefde van God nie en dat alles ten goede sal meewerk vir my omdat, ek Hom liefhet.

Ps. 23:2 “U laat my neerlê in groen weivelde; na waters waar rus is, lei U my heen”.
Met hierdie versie begin ek in meer detail vir God sê wat Hy vir my as Herder en Heerser doen. Ek sien myself in die groen weivelde waarheen God my lei; hier smul ek aan God se liefde, hoop en vreugde. Ek sien ʼn pragtige waterstroompie waarheen God my lei en ek ervaar vrede soos wat net God self dit kan gee. Ek loof en prys God vir die wonder van Sy liefde, hoop, vreugde en vrede.

Ps. 23:3 “U verkwik my siel; U lei my in die spore van geregtigheid, om U Naam ontwil”.
Dit is hier waar ek ervaar hoe God my siel verkwik. Hy neem al die negatiewe gedagtes en ervaringe en breek dit af en vervang dit met nog tonne van sy liefde! Hier dink ek daaraan dat God my verander deur my denke te vernuwe sodat ek volgens Sy wil sal lewe (vgl. Rom. 12:2). Daarom kan ek nie anders as om in Sy spore van geregtigheid gelei te word nie.

Ps. 23:4 “Al gaan ek ook in ʼn dal van doodskaduwee, ek sal geen onheil vrees nie; want U is met my: u stok en u staf dié vertroos my”.
Hierdie versie laat my altyd dink aan enige verliese, terugslae, krisisse of probleme wat oor my pad gekom het. Ek dink weereens aan die versie: Hy laat alles ten goede meewerk vir die wat Hom liefhet. Dan kyk ek terug in my lewe en besef hoe die liefdevolle Vader dinge ten goede laat meewerk. Ek besef dat ek niks hoef te vrees nie, want God is in my en ek in Hom. Ek dink daaraan dat ek nooit alleen is nie, dat Sy liefde altyd in my is en dat Hy my vertroos. Ek dank Hom en prys Hom.

Ps. 23:5 “U berei die tafel voor my aangesig teenoor my teëstanders; U maak my hoof vet met olie; my beker loop oor”.
Ek dink daaraan dat my teëstanders (die bose) net kan toekyk hoe God sy liefde in my laat groei. Ek dink daaraan dat God my salf met liefde, hoop, geloof en ander gawes soos Hy wil. Sy seëninge van liefde, hoop, geloof en ander gawes loop deur my oor na ander mense.

Ps. 23:6 “Net goedheid en guns sal my volg al die dae van my lewe; en ek sal in U huis bly HERE, in lengte van dae”
Ek dink daaraan dat met God binne my en om my, kan dit nie anders as om met my goed te gaan nie. Selfs in slegte tye, want dit is die tye wanneer God sy liefde in my laat groei. Ek dink daaraan dat, met God binne my en ek in Hom, ek al klaar begin het om Sy huis te bewoon en dat dit net beter kan word.

Net so kan jy oor enige gedeelte van die Woord wat tot jou spreek mediteer. Ek hou ook daarvan om oor Ps. 100 en Rom. 12:2 te mediteer. Meditasie kan vir jou in jou soeke na die heerskappy van God in jou, van groot waarde wees.

Deel met ander:

Hoe om Hom beter te leer ken

In die hedendaagse lewe het tyd baie kosbaar geword. Dit het nodig geraak om jou dag haarfyn te beplan. In die besluite gaan dit nie net meer oor wanneer jy wat wil doen nie, maar beslis ook oor hoe jy dit gaan doen. Dieselfde geld beslis ook vir jou verhouding met God, jouself en ander.

Vir my is jou verhouding met God tweeledig, aan die een kant is daar die spesiale tye wat jy alleen met God spandeer. Aan die ander kant is God binne jou en jy in Hom en julle is dus 24 uur ‘n dag in mekaar se teenwoordigheid. Ek dink dit is nogal baie spesiaal of hoe?

Persoonlik gesels ek dikwels deur die dag met God oor verskillende goed wat kan wissel vanaf mense tot werk of sommer die alledaagse. Dit is veral lekker om met Hom te kan gesels as daar iets is wat my pla of as ek myself midde in een of ander krisis bevind.

Dan is daar die spesiale tye wanneer ek werklik God hierbinne in my ervaar en oor diep dinge gesels. Dit is in hierdie tye wat my liefde vir God groei en dan natuurlik ook my liefde vir myself en vir ander. Gedurende hierdie tye is ek so na aan God dat niks anders werklik saak maak nie. Sal dit nie lekker wees om elke minuut van die dag so na aan God te kan leef nie! Dink jouself in so ‘n situasie in! Niks sal jou kan ontstel nie, niks sal jou bekommer nie, geen besluit sal vir jou te moeilik wees nie en jy sal jouself gate uit geniet. Jy sal sommer net kan lief wees vir God, jouself en ander! Jy sal alles in die lewe met liefde hanteer, selfs die moeilike tye. Ek wil waag om te sê dat daar nie ‘n enkele mens hier op aarde is wat nie in sy diepste wese streef na die wonder van ‘n liefdesverhouding met God nie. Ek begeer net al hoe meer van God self, en jy?

Het jy ‘n visie oor jou verhouding met God? Anders gestel, hoe sien jy jou verhouding met God oor ‘n paar jaar? Kyk ‘n bietjie terug na die laaste 5 jaar in jou verhouding met God. Wat sien jy? Is dit nog dieselfde of het dit sterker geword? Sou ʼn visie moontlik ʼn verskil in jou groei kon gemaak het? Ek dink tog dat ʼn visie, in die gejaagde lewe van vandag, ʼn verskil kan maak.

Oor die algemeen word groot ondernemings se visie in groot letters uitgestal op die mure binne hulle geboue. Die doel onder andere is om personeel te herinner aan die visie van die onderneming. Indien jy ʼn visie oor ʼn liefdesverhouding met God het, hoe herinner jy jouself daaraan? In die eerste plek glo ek dat as jy die begeerte van ‘n dieper verhouding met God het, sal jy dit in jou hart skryf. Verder kan jy dit ook op jou kamermuur plak, in jou dagboek of beursie skryf of sommer ‘n “reminder” op jou selfoon plaas. My visie is om my liefdesverhouding met God so te laat groei dat ek elke sekonde van die dag bewus sal wees van Sy teenwoordigheid in my sodat ek in alles wat ek dink, doen of besluit Sy wil sal uitlewe!

Voordat ek met die meer praktiese aspekte begin, wil ek net ʼn kort samevatting gee van die belangrike aspekte wat ek alreeds aangeraak het. Ware liefde begin met ‘n begeerte in jou hart wat God daar plaas deur middel van gedagtes. Tweedens is dit belangrik om oor die tyd wat jy aan jou verhouding met God wil spandeer te dink. Natuurlik heeldag en dan ook spesiale tye. Laastens het ek gepraat oor die belangrikheid daarvan om ‘n visie te hê oor waarheen jou verhouding met God op pad is.

Elkeen van ons is uniek en daarom wil ek geensins voorskriftelik wees oor die besluite wat ons rakende tye en visie moet neem nie. Wees net versigtig vir te veel van ‘n roetine. Ons as mense kan dikwels so vasgevang word deur roetines dat ons die tyd met God as net nog iets beskou wat op ‘n bepaalde tyd afgehandel moet word. As ons hierin vasgevang is, maak ons dit vir ons self moeilik om God se stem op enige ander tyd te hoor en is ons dalk so op ons horlosies gefokus dat ons God glad nie hoor nie. Ek waag dit om te sê dat jy in so ‘n situasie baie stadig in jou liefde vir God, jouself of ander sal groei.

Deel met ander:

Hoe werk Ware Liefde?

Die bron van ware liefde is natuurlik God binne jou! Ek is nie daartoe in staat om die werkinge van God in elkeen van ons se unieke lewens te kan verstaan of te verduidelik nie. In breë glo ek dat God omstandighede en gebeurtenisse, wat goed of sleg kan wees, gebruik om ons bewus te maak van die begeerte na ware liefde binne in ons. God kan natuurlik ook radikaal wees, soos met die verblinding van Paulus (Hand. 9:1-20). Hoe dit ook al sy, God wil die gedagte binne in jou plaas om jou bewus te maak van jou begeerte na Hom.

Hoekom gebruik God dan ‘n gedagte? Alles wat jy wil doen of besluit, begin met ‘n gedagte. Selfs al sou ‘n leeu op jou afstorm, dink jy eers voordat jy reageer. Party mense sou sê dat hulle net instinktief sal hardloop, maar wat veroorsaak die instink, dit moet tog ‘n gedagte wees? Jou oë vertel vir jou brein dat ‘n leeu op jou afstorm en jou onmiddellike gedagte is, hardloop. Dit is dan ook net natuurlik dat jou Skepper wat jou beter ken as enigiemand anders ook gedagtes sal gebruik om by jou die begeerte na Hom aan te wakker.

Hoe werk die gedagte ding dan? Was jy al ooit verlief? Dink ʼn bietjie terug aan hoe jy verlief geraak het. Was dit die mooi voorkoms van ‘n pragtige jong dame of heer wat jou aandag getrek het? Was dit die spontaniteit of humorsin? Was dit dalk die sensitiwiteit vir ander mense of was dit dalk sommer net die lekker gesels? Hoe ook al, dit moes met ‘n eerste gedagte begin het, of hoe? Die eerste gedagte en dalk nog ‘n paar ander het gelei tot die begeerte in jou hart om die persoon beter te leer ken. Jou begeerte het daartoe gelei dat jy gepoog het om die ander persoon te leer ken deur meer tyd saam te spandeer en dinge saam te doen.

God plaas die gedagte in jou hart wat lei na ‘n begeerte om Hom beter te leer ken. Teen die tyd weet ons al dat dit sal lei na ware liefde vir God, ware liefde vir jouself en ware liefde vir ander. Net soos in die geval met mense sal jy ook meer tyd met God wil spandeer om Hom te leer ken. Hoekom sê ek nie eerder, moet spandeer nie? Doodeenvoudig, ek glo dat goeie verhoudings gebou word, omdat mense dit graag wil doen. Sodra jy voel dat jy ‘n verhouding met enigiemand moet bou, gaan jy dit heel waarskynlik teensinnig doen en gaan dit of stadig groei of stagneer. Aan die anderkant kan ‘n, “ek moet”, ook tog mettertyd soos mense mekaar leer ken na ‘n, “ek wil”, verander. So indien jy op hierdie stadium voel dat jy tyd met God moet spandeer, doen dit gerus. Ek glo dat ‘n verhouding met God self nie anders kan as om jou, “ek moet”, na ‘n, “ek wil”, te verander nie.

Deel met ander:

Soek jy Ware Liefde?

Wat sou jy sê is die grootste vereiste om in enigiets waarin jy belangstel te verbeter? Ek dink dit begin beslis by ʼn begeerte. Wat jy ook al wil bereik, ʼn sterk begeerte sal jou inspireer om spesiale aandag daaraan te gee. Indien dit dan vir enigiets in jou lewe geld, hoekom dan nie ook vir jou verhouding met God of te wel Liefde self nie? Is jou begeerte na God nie sterk genoeg nie? Is die ander dinge in jou lewe werklik meer belangrik? Wat sê die Bybel hieroor?

Luk. 12:31 “Maar soek die koninkryk van God, en al hierdie dinge sal vir julle bygevoeg word.” Doen jouself ‘n guns en gaan lees ook die voorafgaande versies. Ek wil egter ook verwys na dié versie soos dit in die “Modern Young’s Literal Translation” staan: Luk. 12:31 “but, seek you the reign of God, and all these things shall be added to you.” Ter verduideliking, die MYLT Bybel is vertaal net soos dit in die Grieks staan, en is dus ‘n meer korrekte weergawe van die oorspronklik Griekse woorde. Vandaar dat die woord “heerskappy” in plaas van “koninkryk” gebruik word.

Die betekenis van die woord, heerskappy, sê net vir my soveel meer as die betekenis van die woord: koninkryk. Koninkryk, is vir my iets wat verwys na ‘n plek soos byvoorbeeld die koninkryk van Engeland. Ek dink mense verwys ook graag daarna as die hemel. Die woord heerskappy sê vir my dat hier iets aan te gebeur is. Hier word geheers en dit is geensins plek gebonde nie. Wie kan dan nou ook God net op ‘n spesifieke plek plaas?

Soek jy eerder na die koninkryk van God of soek jy na die heerskappy van God? Ek kies loshande die heerskappy van God, omdat Hy dan binne in my heers. God is mos binne my en ek in Hom. Mense, as God eers binne jou heers, is jy in ‘n ander wêreld, want dan raak dit al hoe makliker om jouself waarlik lief te hê. Dit kan mos nie anders nie, want God of anders gestel, Liefde, heers dan in jou!

Goed, maar hoe soek ek dan na die heerskappy van God? Indien jy die voorgaande vraag aan jouself stel, dan vermoed ek dat jy alreeds ‘n begeerte in jou hart het na die heerskappy van God in jou lewe. Jy soek dus na ware liefde en geluk in jou lewe.

Wat dan indien jy nie die begeerte het nie? Dan wil ek net graag vir jou sê dat jy net nog nie daarvan bewus is nie. Diep binne in jou is dit wel daar! Ons het ‘n natuurlike honger na ware liefde. Die honger het jy al gehad toe jy nog doeke gedra het. Waarmee kan jy die honger stil, indien nie ware liefde nie? Is dit status, prestasies, baie geld, mooi motors, mooi huise, mense, jou lewensmaat of iets anders wat ek nie genoem het nie? Die vraag wat jy jouself kan afvra, is: Hoe lank kan die goed of mense my gelukkig maak? Is dit nie maar net tydelik van aard nie? Soek jy nie telkens, maar weer na iets anders om jou gelukkig te maak nie? Raak die voortdurende gesoek na geluk nie naderhand ‘n sinnelose vermorsing van tyd nie? Dink jy nie dat daar baie meer potensiaal daarin is om eerder na die heerskappy van Ware Liefde binne jou te soek nie? Ek kan jou verseker dat jy nie spyt sal wees nie.

Dit bring my by die tweede deel van die versie: Luk 12:31- Maar soek die heerskappy van God, en al hierdie dinge sal vir julle bygevoeg word. Wat is al hierdie dinge waarvan Jesus hier praat? In vers 27 maak Jesus ‘n vergelyking wat ‘n mens stom slaan: Luk 12:27- Kyk na die lelies, hoe hulle groei: hulle arbei nie en hulle spin nie; en Ek sê vir julle, selfs Salomo in al sy heerlikheid was nie bekleed soos een van hulle nie. Jesus sê dus dat jy jou nie moet bekommer oor of jy al die dinge wat nou vir jou belangrik is gaan kry nie, want God weet wat jy nodig het en jy sal dit kry.

In my woorde, soek dus eers na die heerskappy van Ware Liefde of te wel God in jouself, en al die dinge wat jy nodig het, sal vir jou gegee word. Die belangrikste dinge sluit in ware liefde vir God, jouself, jou naaste en daarmee saam die geluk waarna jy so soek. Wat meer wil ‘n mens hê?

Deel met ander:

Wie is jy?

Ek wonder hoe goed ken jy jouself. Om jouself waarlik te kan liefhê moet jy tog jouself ken. Indien jy nie jouself ken nie, wil jy mos jouself leer ken, of hoe? Ons is elkeen uniek en daarom glo ek beslis nie daarin om mense as sekere tipes persoonlikhede of sterretekens en dies meer te klassifiseer nie. Dink ‘n bietjie terug, is jy werklik nog dieselfde mens as 10 jaar terug? Hoe realisties kan die klassifikasies dan wees? Jy is nie vasgekeer in ‘n sekere tipe persoonlikheid nie en jy kan, met genade van God, beslis verander na die mens wat God vir jou bestem het om te wees. Jy moet net lief raak vir jou self.

Ek noem hieronder ‘n paar eienskappe van mense, maar dit is slegs ‘n raamwerk om jou ‘n idee te kan gee van wie jy op hierdie oomblik is en oor hoekom jy jouself nog nie waarlik lief het nie.

Al gehoor dat mense half sarkasties sê: “Daai ou is verskriklik lief vir homself!” Ironies genoeg is so ‘n persoon dalk juis nie baie lief vir homself nie. Dink net daaraan, hoekom moet jy die heeltyd jou eie beul blaas? Dalk is jy so ongelukkig binne jouself dat jy al die aandag op jouself wil hê om belangrik te kan voel. Is jy werklik lief vir jouself?

Mens, maar moet nie vergeet nie dat party mense net lewendig van geaardheid is nie. Wie geniet nou nie ‘n mens met ‘n lewendige geaardheid nie. Sulke mense is dikwels die lewe van ‘n byeenkoms. Onderskei derhalwe mooi voor jy ‘n “die ou is verskriklik lief vir homself etiket” aan iemand heg. Weet jy as jy regtig lief raak vir jouself gaan jy nie sommer ‘n etiket op iemand anders plaas nie. Dit sal nie ‘n besluit wees nie, dit sal sommer net so wees.

Dan kry jy mense wat altyd lyk of hulle agter ‘n tafel wil wegkruip as hulle jou sien. Jy is nie dalk een van die tipe mense wat sukkel om ‘n ander in die oë te kyk nie? Dalk te bang om iets te sê. Dalk te bang om voluit te lewe! Sou jy sê dat jy jouself waarlik lief het?

Daar is die stil, ernstige mense. Hulle is so intens gefokus om doelwitte te bereik dat hulle nie eers bewus is van ander mense se bestaan nie. Is jy dalk só doelgerig dat jy baie van die mooi dinge in die lewe soos liefde vir jouself en vir ander heeltemal miskyk? Dink jy dalk dat deur jou doel te bereik gaan jy die toppunt van geluk bereik? Hoe permanent, dink jy sal die geluk wees? Vergelyk dit met hoe jou opgewondenheid oor ‘n nuwe motor met die verloop van tyd vervaag. Wat dryf jou – is dit status, rykdom of ware liefde?

Wie ken nie ‘n kwaai mens nie? Hulle kom partykeer so skielik op jou pad en raas oor iets wat totaal en al onbenullig is. Daar is niks daarmee verkeerd om kwaad te word nie, solank dit met goeie rede is. Soms is dit regtig nodig vir jou en ander se beswil. Indien jy egter heeldag en aldag oor ander kla en werklik onnodig kwaai is, kan ek nie help nie om te wonder, hoekom dan so? Kla jy nie dalk ook heeldag oor jou eie doen en late nie en raak jy nie dan nog boonop sommer kwaad vir jouself nie? Dit is nie altyd so maklik om so iets in jouself te identifiseer nie, maar met ‘n bietjie nabetragting oor ‘n paar dae kom jy dit dalk tog agter. Die ooglopende vraag is: Dink jy dit is goed om jouself aanmekaar af te kraak? Dink jy dat jy jouself waarlik lief het? Indien wel, hoekom dan die heeldag se gebaklei met jouself en ander mense?

‘n Laaste groep mense waaraan ek kan dink, is seker die moeilikste om te identifiseer. Dit is die ou wat altyd alles reg doen. Die persoon is altyd op tyd, reg aangetrek en sê altyd die regte goed vir die regte mense. Moet jy altyd in beheer wees, moet jy altyd alles perfek doen en moet jy altyd goed lyk? Dink jy dat dit regtig is hoe jy is, of is dit dalk net hoe jy graag wil hê ander mense jou moet sien? Indien jy jouself waarlik lief het, hoekom is dit dan nodig dat alles altyd perfek voor ander se oë moet wees?

Kan jy jouself in die voorbeelde hierbo identifiseer? Is jy dalk ‘n kombinasie van verskillende tipes, of is jy sommer net heel anders? Dit is beslis moontlik om anders te wees, elkeen van ons is mos uniek. Hoe jy jouself ook al identifiseer, glo ek dat elkeen van ons daarna wil streef om werklik so lief vir onsself te wees dat ons nie ander persone nodig het om gelukkig te wees nie. Ek waag dit om te sê, hoe meer jou ware liefde vir jouself, hoe minder sal jou onsekerheid word met die neem van besluite. Jy sal net al hoe meer weet wat jy wil hê. Dink jy dit is moontlik?

Deel met ander:

Hoe seker is jy oor Ware Liefde?

Ek wil graag die basiese dinge wat ek van ware liefde geleer het met jou deel. Dit is eintlik so eenvoudig. Jy het sekerlik al dikwels daarvan gelees of daarvan gehoor, maar dalk nog nooit die diepte daarvan besef nie.

Ons almal besef dat mense dikwels onseker is oor die betekenis van ware liefde. Dink jy nie die redes vir ons onsekerheid kan dalk vir ons antwoorde gee oor ware liefde nie? As jy nie onseker was nie, sou dit tog baie maklik gewees het om ‘n besluit te kon neem. Dink jou in ‘n wêreld in waarin almal seker is van wat hulle wil hê. Jy sou nie meer ‘n besluit hoef te geneem het nie, jy sou sommer net geweet het. Jy sou sommer net kon lief hê. Mmm… nog beter, jy sou onvoorwaardelik kon lief hê. Is dit werklik moontlik? Hoe dink jy?

Wat veroorsaak die onsekerheid dan? Kom ons begin by die samestelling van liefde. Daar is tog twee persone nodig of hoe? Miskien dalk net een? Lê die probleem van die onsekerheid by jou, of dalk by die ander persoon? Dit kan tog enige van die twee opsies insluit, behalwe as beide onseker is. Feit is, jy kan binne jouself weet wat jy wil hê, maar is dit ook wat die ander persoon wil hê? Hoe kan jy weet of die ander persoon seker is? Dit is glad nie ʼn maklike vraag nie en dit kan selfs ‘n mens wat wel seker was, onseker maak.

Die slim mense sê altyd dat jy nie jou tyd moet mors op iets wat jy nie kan verander nie, maar eerder moet fokus op iets wat jy wel kan verander. Fokus dus eerder op die belangrikste! Ware liefde vir jouself! Ja, indien jy dit nie geweet het nie, ware liefde begin beslis by jouself. Dink jy nie dat as jy ware liefde binne jouself beter verstaan, dit dalk makliker sal wees om ander waarlik lief te hê nie?

Een van die belangrikste vrae wat jy ooit in jou lewe gevra sal word, is: “Het jy jouself onvoorwaardelik lief?” Mens, ek sê vir jou, die is ‘n taai een. Dink eers goed daaroor na voordat jy sommer net “ja” sê. Indien jy nie weet nie of dalk nee sê, glo my dit is nie die einde van die wêreld nie, maar die begin van ‘n wonderlike ontdekkingsreis.

Deel met ander:

Wat is Liefde?

Wat is liefde? Of eerder, wat is ware liefde? Dit is seker ʼn vraag wat amper so oud soos die mensdom is. Dit is baie moontlik dat ieder en elk van ons al daaroor gewonder het. Geen wonder dan dat elke tweede storieboek of fliek se hooftema liefde is nie. Indien nie die hooftema nie, word dit altyd op een of ander manier ingewerk. Wanneer laas het jy byvoorbeeld ʼn aksie fliek sonder ‘n tikkie romanse gesien? En slaag die skrywers van romantiese stories nie wonderlik daarin om liefde as ʼn absolute hemel op aarde uit te beeld nie? Hoe realisties is die romantiese uitbeeldings van liefde? Hoe dink jy, is dit werklik ware liefde? Aan die ander kant van die spektrum is die ernstige studente. Dit is die mense wat diep navors en sielkundige of geestelike boeke oor die onderwerp skryf. Ander mense gryp graag na al die boeke, video’s en natuurlik die internet om te help om daardie belangrike liefdesbesluite te neem. Wat sou jy sê, is nader aan die waarheid? Die idealistiese beeld geskep deur die vermaaklikheidswêreld of die meer realistiese, dog ernstiger beskouing van die studente. Is ware liefde ‘n besluit of is dit nie dalk sommer net om lief te wees nie? Lees asseblief verder! Dit gaan jou glad nie lank neem nie en dit kan beslis jou lewe ten goede verander.
Deel met ander: